बंगलादेशका नेपाली विद्यार्थी भन्छन्– घर फर्काइदेऊ सरकार

पूर्वी नेपालको फूलबारी नाकाबाट थोरै दुरीमा रहेको सार्क राष्ट्र बंगलादेशमा रहेका नेपाली विद्यार्थीहरु त्यहाँ कोरोनाको संकट बढ्दै जाँदा त्रस्त बनेका छन् । उनीहरु चाँडोभन्दा चाँडो नेपाल फर्कन चाहन्छन् ।
कोरोना संक्रमण फैलिन थालेपछि बंगलादेश सरकारले त्यहाँ गत मार्च २६ देखि देशब्यापी लकडाउन घोषणा गरेको छ । तर, लकडाउनको राम्ररी पालना भएको छैन । अहिले पनि सडकमा आवागमन बाक्लै रहेको स्थितिमा कोरोनाको प्रकोप फैलिन सक्ने आशंकाले नेपाली विद्यार्थीहरु चिन्तित बनेका हुन् ।

ढाकाको युनिभर्सिटी डेन्टल कलेजमा अध्ययनरत विद्यार्थी गरिमा सुवेदीले आफूहरु अन्योल र त्रासको अवस्थामा रहेको बताइन् । अनलाइखबरसँग टेलिफोन सम्पर्कमा उनले भनिन्, ‘नेपालमा भन्दा कोरोनाको संक्रमण यहाँ धेरै बढी छ । हामी आफ्नै देश फर्कन चाहन्छांै ।’
कलेजको होस्टलमा बस्दै आएकी गरिमाले आफूसँगै करिब डेढ दर्जन नेपाली विद्यार्थी त्यहाँ रहेको बताइन् । उनीहरुमध्ये ११ जना छात्रा छन् । उनीहरुको अन्तिम वर्षको परीक्षा चलिरहेको थियो, तर लकडाउनले रोकियो ।
‘हाम्रो परीक्षा चलिरहेकाले चाँडै नेपाल फर्कन पाएनौं, परीक्षा रोकिँदासम्म नेपालमा लकडाउन भइसकेको थियो,’ गरिमाले सुनाइन् ।
आफ्नो कलेजमा अध्ययन गर्ने अरु सबै विदेशी विद्यार्थीहरुलाई सम्वन्धित देशले नै प्रबन्ध मिलाएर घर फकाइसकेको उनले बताइन् । गरिमाका अनुसार होस्टलमा अब विदेशी भनेको नेपाली विद्यार्थी मात्रै छन् ।
‘भुटानले समेत प्लेन चार्टर गरेर आफ्ना विद्यार्थी फिर्ता लग्यो, हाम्रो चाहिँ अहिलेसम्म केही पहल भएको छैन,’ उनले भनिन् ।
बंगलादेशमा ३/४ हजारको संख्यामा नेपाली विद्यार्थीहरु अध्ययनरत छन् । कोरोनाको त्रास बढ्दै गएपछि अधिकांश विद्यार्थी घर फर्किएको नेप्लीज मेडिकल स्टुडेन्ट एसोसिएसनका अध्यक्ष नवीन यादवले बताए ।
यादवका अनुसार अहिले करिब ७ सय नेपाली विद्यार्थी मात्र बंगलादेशमा छन् ।